• fruhling 11
  • fruhling 12
  • fruhling 13
  • fruhling 14
  • fruhling 15
  • fruhling 16
 

Us mym Tagebuech

Syt mir Suechi nach em Stouffacherplatz im Juni, lat mi eifach dä Breitsch nüm los. So mängs us mir Chindheit chunnt mer wider i Sinn u i probiere's ufz'schrybe. Isch's würklech so gsy? Het's würklech so usgseh? I muess eifach no einisch chly ga umeluege. Hüt nimen i d Elisabethestrass 39 u dr Birkewäg 34 bsunders under d Lupe. Wohl, beidi Hüser stöö no, win i se in Erinnerig ha; a däm vom Birkewäg het's nöi Balkön. I dene Strasse isch gloub d Zyt chly blybe staa. Das apartige Huus unde ar Flurstrass, wo emal ds Konsum isch drin gsy, steit o no - früsch renoviert, nume chly z rot, dünkt mi. Wenn i scho hie bi, machi no grad "Kontrolle" vor Wylerstrass, zwüsche dr Standstrass u em Birkewäg. Statt dr Beckerei isch e Wullelade, dr Spezereilade isch verschwunde u wo Gärber's Milch verchouft hei, git's jitz Gmües. Dr Dame- u Herresalon Schütz het e andere Bsitzer u i cha mi dert o nüm gratis la frisiere. (My Schwöschter u my Schwager hei dä Salon bis 1977 betribe). Us dr Metzgerei Zürcher isch es Büro worde. U was söll das sy bir Drogerie Mühlima? E Trödler oder e Beiz? Bis uf's Trottoir isch alles überstellt mit zämegwürflete Stüehl u Tischli. Am Strasserand sitzt ufe me chlyne Bänkli e Frou, schön ir Sunne, es Bierglas näbe sich. Manne fuuschte a öppisem ume. I luege däm Trybe e Momänt zue u studiere, win i mit em Rolator dürechume. Eine vo dene Manne chunt cho Platz mache. I frage: "Isch das eigetlech e Gartewirtschaft oder e Brockestube?" Weit dir öppis trinke, fragt dä zrügg. Warum eigetlech nid? Es Gaffee wär nid schlächt. I setze mi näbe die Frou, wo offesichtlech die Manne guet gchennt. Dä Ma stellt mys Gaffee zersch näbe ds Bier ufs Bänkli, de chehrt er das, won er dran umegschrubt het um - es isch es ganz nöijs Tischli - u stellt ds Gaffee u ds Bierglas druf. Di Frou erklärt mer, die syge äbe dran, die alte Möbel gäge nöji us z'tuusche. Mir chöme mitenand i ds Gpräch. Si heig bis vor churzem als Spitex gschaffet. Si gchennt sech guet us im Quartier - für mi überuus interessant. E wytere eltere Ma chunt zueche, nickt mir fröhlech zue, umarmt die Frou u geit mit de andere Manne ine. I bi im Begriff z'gaa, da chunnt dr Bsitzer use u drückt mer das Gäld, won i zahlt ha wider i d Hand: Dä Nachkömmling heig drum Geburtstag u wöll hüt alles zahle. Was blibt eim da übrig als däm Spänder z danke u "alles Guete zum Geburtstag" zue z'rüefe. Was für Landslüt das sy, hani nid usebracht. Sicher nid Bärner, dene chäm so öppis nid i Sinn!

I ga wyter. Zwüsche zwöine Hüser tuen i e Blick uf d d Rücksyte vor Greyerzstrasse 78 (mis Dehei vo 1935 bis 1951); das heimelet mer. Bim Chilchgmeinhuus isch d Türe offe, i ga chly ga gwundere: Wohl, es chunnt mer bekannt vor; nume het's albe no ke Gaffeebar gha. De loufeni i z'rings um d Chilche, wo ohni Efeu ganz anders würkt. E Tafele näbe dr Houpttür ladet y zum Ynecho: Was machen i mit em Rolator? Es hat ja vier Stägetritte, o bi de Näbetüre. Da la ne halt la staa u zieh mi am Gländer ufe. I sitze uf ne Bank u luege gründlech ume. Isch dä Chor geng so höch gsy? U die Fänschter so lüüchtig? Wäred de drü Jahr Konf-Unterricht hei mer eigetlech flyssig z Predig müesse. D Meitschi sy uf der Gallerie rächts gsässe u d Buebe uf der lingge Syte. Da hei mir müglecherwys nid unbedingt Chilchefänschter betrachtet. Wohl, si gfallt mer, die renovierti Chilche. Hälli Bänk u o das hälleTäfer unde düre. Dert hets doch früecher usgseh, wi we dunkelgrüene, drappierte Stoff ufghänkt wär; aber es isch nume aagmale gsy. Dr Spiilegge für die Chlyne finden i prima. Aber was macht me mit Lüt, wo nüm so guet z'fuess sy? Villecht im Rollstuel? Wär das nid e Ufgab für e Leischt, em Chilcherat vorz'schla, bi eire vo dene Türe e Rampi z'boue?

Jitz gan i d Spitalackerstrass z'düruuf bis zum 59gi. Bevor ds Chilchgmeinhuus isch boue worde, isch dert im ne chlyne Saal d Sundigschuel gsy; uf eme Podium es Harmonium u druf ds Negerli, wo üsi Zäni mit eme Chopfnicke verdanket het. I däm Huus isch nachhär ds erschte Migros eröffnet worde. Aber da drüber schryb i speter.

Text: Irène Hellstern-Haymoz, Bümpliz 07. September 2015

© 2018 Leist Bern-Nord (LBN)

LINK
SITEMAP
IMPRESSUM

 

Alle Rechte vorbehalten

 
Kontakt
 
Leist Bern-Nord (LBN)
Postfach 415
CH-3000 Bern 22
 


leist-bern-nord@bluewin.ch
Postkonto 30 - 13754-9
Leist Bern-Nord, Bern 22